Nagsunad nin propwestong ley si Paranaque 2nd District Representative Brian Raymund Yamsuan nganing labanan an paglakop kan artificial intelligence (AI)-generated fraud sa paagi kan mahigpit na implementasyon na regulasyon sa paggamit nin deepfakes.
Hinagad kan Paranaque solon sa Kongreso na ipasa an House Bill (HB) 3214 na may katuyuhan na protehiran an mga Pilipino sa AI-generated deepfakes na pwedeng gamiton nganing dayaon an publiko, raoton an reputasyon, pagsagin-sagin nin mga indibidwal asin maski magladawan nin mga tawo asin non-consensual sexual content, pwedesir man ining gamiton sa pagmaniobra kan diskurso pulitikal, asin magresulta pa sa kadahasan.
Sinabi kan Kongresista panahon na nganing magkaigwa nin matibay na ley laban sa mga deepfakes na an pakay iyo an mang-scam nin kapwa, mangraot, o magpalakop nin fake news.
Sa irarom kan HB 3214 o an ipigsuhestyon na Deepfake Regulation Act, an kada Pilipino an dapat magkaigwa nin likas na direchos sa sadiring itsura, kabale an pandok, hawak asin boses, nin dae nangangaipuhan nin pangenot na pagpaparehistro para sa trademark o proteksyon sa copyright.
Pigpoprotektaran man kan HB 3214 an sisay mang tawo na an pagkakahawig an ginamit nin warang permiso sa sarong deepfake sa paagi kan pagkakaigwa nin direchos na paghagad na pag-tanggal kan bako awtorisadong laog hale sa platform kun saen ini naka-host.
An plataporma dapat man na magsunod sa kahagadan sa paghale sa laog nin 48 oras pagkatapos na mag-tanggap nin sarong reklamo na may patunay.
An sisay man na tawo o plataporma na makukua na tuyong nagmukna, nagdistribwir, o nagsayuma na maghale nin deepfake content pakatapos kan sarong valid na abiso papadusahan nin pagkapreso poon duwa hasta limang taon asin multa poon P50,000 hasta P200,000.
An mga online platform na dae makasunod sa removal requests sa laog kan itinalaan na 48-oras, mamultahan nin P50,000 kada aldaw nin dai pagsunod sa irarom kan bill.
-generated fraud through strict implementation of regulations on the use of deepfakes.){kind=link}