LEGAZPI CITY-Pigbubusol na ngonian sa senado sa an propwestong ley na nagtutugot sa Bangko Sentral ng Pilipinas (BSP) na busisihon an bank deposits na pinagtutubudang may kinaaram sa mga iligal na akatibidad, kasunod kan mga nangyayaring katiwalian sa gobyerno.
Nakalaag sa Senate Bill No. 1047, an obhetong pag-amyenda sa Republic Act No. 1405, o an Secrecy of Bank Deposits Law, ngani tugutan an BSP katuwang an hukuman, na busisihon an mga kahina-hinalang bank account kun may bastanteng ebidensya nin panunuhol, pangdaraya, money laundering asin iba pang pagbalgar na may kinaaraman sa salapi.
Pwedisir suboot na isagibo an anumang imbestigasyon kun may malinaw asin bastanteng batayan kan seryosong iregularidad asin kinakaipuhan na aprubado kan Monetary Board kan ahensya ngani masierto an tamang preseso asin maibitaran an pang-aabuso.
An mga impormasyong makakalap hale sa pagbusisi an dapat suboot gamiton para sa opisyal na layunin, siring kan pag-iimbestigar sa mga krimeng pinansyal.
Naglatag man nin mahigot na regulasyon ngani mamantenir an proteksiyon sa privacy kan mga depositor kaiba na pagbabawal sa pagbusisi kan mga bank acounts sa panahon kan eleksyon.
Protektado man an kwartang naideposito bago pa an pagpapaotob kan ley asin an resulta kan anumang pagbusisi an dai bastang maibubuyagyag sa publiko, afuera kun kinakaipuhan ngani makapagsangat nin kasong kriminal.
Sakop man kan propwestong ley an parehong peso asin foreign currency deposits, na obhetong balansehon an direchos kan mga namamanwaan sa privacy asin an pangangaipohan na pakusugon an kampanya laban sa katiwalian asin iba pang krimen na may kinaaraman sa pinansyal.
