LEGAZPI CITY- Suportado kan Philippine Drug Enforcement Agency (PDEA) sa Bicol an propuesto na i-regionalize an preso tangarig dae na magdakula an transaksyon kan iligalidad na hale sa New Bilibid Prison.
Aminado kaya an ahensya na nakakalusot man giraray an nagkapirang transaksyon sa presuhan urog na an sa iligal na droga.
Ipighayag ni PDEA Sorsogon Provincial Officer Investigation Agent V Enrique Lucero sa intrevista kan Bombo Radyo Legazpi na kun mawot na mapuho an nagdadakulang network kan mga ini, dae na dapat ipagasabay sa mga darakulang ‘drug lords’.
Nag-apelar man an opisyal sa mga nagbabantay sa NBP na magin mahigot sa seguridad asin mapuho an mga iligalidad.
Nagtutubod man si Lucero na wara sindang magiginibo kun warang magigin pagbabago sa itaas na pinaghahalean kan transaksyon.
