LEGAZPI CITY – Back to basics an pagirumdom kan Department of Health (DOH) Bicol tangarig na makaibitar sa resurgence o liwat na pagbabalik kan kaso kan polio sa Pilipinas.
Ini an kasunod kan kumpirmasyon ni Health Secretary Francisco Duque III na may kaso na kan helang sa sarong aki sa Lanao del Sur, makalihis an haros duwang dekada na pagigin polio-free.
Pag-eksplikar ni DOH Bicol Director Dr. Enie Vera sa intrevista kan Bombo Radyo Legazpi, naipapasa an virus sa paagi kan oral fecal content o kun makalaog sa estomago kan sarong persona an ati na hali sa tawong igwa nin polio.
Kaipuhan na ipraktis suboot an proper hygiene sa personal man asin palibot siring kan paghugas nin kamot asin pagkonsumo nin mga malilinig na pagkaon o inumong tubig.
Inantisiparan naman an pagluwas kan nasabing kaso urog pang nagbaba sa labi 60% an saklaw kan nabakunahan kan polio vaccine sa mga nakalihis na taon kumpara sa 95% na target sa komunidad.
Nasa huma kan pagkakaigwa kan nasabing helang an mga aking edad 5-anyos pababa na dae nabakunahan kan tulong dosage kan vaccine asin hibaba man an resistensya.
Siring kan sintomas kan paglaog nin virus sa hawak, kakalinturahon, sisipunon asin makulog an payo kan aki hasta sa manluya urog na pig-aatake kan helang an utak asin nerve endings na posibleng mauli sa pagkaparalisado.
Katakod kaini, nagpatanid an opisyal na magpasiring na sa health centers para magpabakuna.
