LEGAZPI CITY- Pigkakarkulong sa masunod na bulan pa kan Pebrero pormal na mailulunsar an programa kan Department of Trade and Industry (DTI) na P3 o Pondo para sa Pagbabago at Pag-asenso na panribay sa 5-6 lending system na pig-oopresir kan mga Indian Nationals o Bombay sa mga micro businessmen.
Sa intribista ki Bem Verango, tagapagtaram kan DTI Bicol, sinabi kaini na iyo an pigtatangrong alternatibong funding program kan ahensya para sa mga saradit na negosyante kun sain urog na madali an access, dae nin collateral asin hibaba an interes na nasa 2.5% sana kada bulan kumpara sa 10% sa 5-6.
Sigon pa ki Verango, an katakod na ahensya kan DTI an mamanihar kan P3 na iyo an Small Business Corporation.
P1 billion suboot an pig-alokar na pondo digdi para sa nasambitan na funding system.
Dugang pa kan opisyal, dakulang tabang an programa sa mga market vendors, agri-businessmen, myembro kan kooperatiba asin industry associations.
Alagad dae pa suboot kumpirmado sa ipigtaong guidelines kan ahensya kun kabale an mga tagsadiri nin sari-sari store sa mga pwedesir na magbenepisyo digdi.
Mientrastanto, isasagibo muna kan DTI an pilot testing kan P3 sa mga pinakapobreng probinsya sa Pilipinas arog kan Tacloban, Leyte, Mindoro asin Saranggani antes na ilunsar sa iba pang lugar.
