LEGAZPI CITY—Pighayag kan Bureau of Fisheries and Aquatic Resources Albay na nagkaigwa nin pagbaba sa produksyon kan sira makalihis an mga naeksperyensyahang maraot na panahon sa provincia.
Segun ki BFAR Albay Provincial Fisheries Officer Alvin Christopher Lat, sa intrevista kan Bombo Radyo Legazpi, na nagpuon pa kan nakaaging taon an hababang produksyon sa sira.
Dugang niya na an panahon kan taglipot an nakakaapektar sa pagtalubo kan mga sira kun sain dae man sinda masyadong nagkakaon kaya maaapektaran kaini an saindang produksyon.
Huli kaini ipigsuhestyon ni Lat sa mga parasisira na kun kaya ninda mag-shift an pwedesir na maglipat hale sa capture fisheries pasiring sa aquaculture—huli sa mas magayon an mag-ataman nin sira arog kan tilapia kaysa mag-risk sa kadagatan huli sa warang kasiertohan na magdadara ini nin madadakop na sira.
Naglalaom an opisyal na magkaigwa nin ibang opsyon an mga parasisira nganing magkaigwa nin ganansya siring kan pagkonsidera sa aquaculture huli sa mas dakula suboot kaini an potensyal asin nasa hampangan sana an mga pig-aatamang mga sira.
