LEGAZPI CITY – Nagtutubod an sarong kongresista na an problema sa iligal na droga sa nasyon an mas malala pa sa problema sa pulitika kaya dae a suboot paghaluan nin politika an isyu sa nadiskubreng shabu lab sa Virac, Catanduanes kun sain pig-immbwelto an pangaran kan nagkapirang lokal na opisyal.
Segun ki Congressman Cesar Sarmiento kinakaipuhan na suboot ining mapuho para sa ikakarahay kan masunod na henerasyon asin ikaka-uswag kan sosyudad.
Kasabay kaini, kinuwestyon man kan opisyal kun siisay an may responsibilidad sa pagbabantay kan paglakop kan iligal na droga asin kun igwang nangyayaring koordinasyon sa PNP asin iba pang drug enforcement agencies.
Segun sa opisyal, dae dapat na nakakalaog sa probinsya an siring na iligal na droga urog nang saro man sana ining sadit na isla.
Nabigla man ini sa capabilidad kan nasambit na shabu lab na makapag produsir nin saro-mi-kabanga na tonelada nin shabu kada semana na igwang street value na maabot sa P6 billion.
Mientrastanto, pinagkokunsiderar an nasambitan na congressional inquiry bilang tsansa na mapuho an droga sa isla.
