LEGAZPI CITY- Nanindugan an sarong environmental group na dapat tawan atensyon kan gobierno an problema sa basura, makalihis an maladagat na basura sa nagkapirang parte kan nacion huli sa mga pagbaha na dara kan habagat.
Segun ki Ban Toxic Campaigner Thony Dizon sa intrevista kan Bombo Radyo Legazpi dakol na factors an kinakaipuhan na hilingon asin dae sana ipagbasol sa mga namamanwaan.
Aminado an opisyal na maski igwa na nin mga lakdang an mga lokal na gobierno sa pangangataman sa basura, bako pa ini bastante sa ngunyan.
Sinabi kan opisyal na pirmihan na nagiging ‘scapegoat’ an disiplina kan mga tawo sa pagtatapok kan basura, alagad dae nahihiling an bako matanos na implementasyon kan mga ley asin polisiya.
Dagdag pa ni Dizon na sa irarom kan ley, malinaw na igwang mandato an mga lokal na gobierno na magpaotob nin ten-year solid waste management plan alagad dae ini nahihiling sa ngunyan.
Inihayag man kan opisyal na dapat na dae napupuno an mga sanitary landfill sa nacion.
Mientras tanto, ipinunto man kaini an pangangaipo kan matanos na edukasyon sa mga namamanwaan asin matanos na sistema kan pangongolekta, segregation asin iba pa.
