LEGAZPI CITY – Nakapagrehistro nin pinakahalangkaw na kaso nin panlulugos an probinsya kan Sorsogon sa nakalihis na taon.
Ini an susog sa ipinalowas na report kan Women’s & Children’s Desk kan Sorsogon Police Provincial Office na igwa nin kinaaraman sa mga naerehistrong Crimes Againts Children o CAC kan nakalihis na 2016.
Uminabot sa 11 kaso an naerehistro sa ciudad sa nasambit ng peryodo na pinagsunudan kan Irosin, 8 asin Pilar Municipal Police Station sa 6 na kaso.
Sa ibong kaini, ipighayag kan Sorsogon Police na buminaba nin haros 41.05 porsiento an kasong rape kan nakalihis na taon kun saen may kabilugan na 56 na kaso nin rape kan 2016 kumpara sa 95 na bilang kan 2015.
Segun sa Sorsogon Police Provincial Office, nagkaigwa nin pagbaba sa iba pang krimen kun saen mga menor de edad an biktima asin kadaklan mga kababayehan siring kan Acts of Lasciviousness, Kidnapping, Rape with Homicide, Incestous Rape, Attempted Rape, Child Trafficking, Murder, Attempted and Frustrated Murder, Homicide asin iba pa.
