LEGAZPI CITY — Nakatalaan na tawanan nin military honors si Private Bernie John Lunas, an suldadong Albayano na nagadan sa bakbakan sa Marawi City.
Segun ki Mayor Dinky Romano, alkalde kan banwaan kan Bacacay, Albay, ini an ngani na maipahiling an pagsaludo sa pagigin heroe ni Lunas.
Ini an apwera pa sa high noon salute na itinao sa Fort Bonifacio sa Taguig City kasabay kan aldaw kan katalingkasan.
Katakod kaini, pigsiyerto man kan alkalde na malalaoman an saiyang presensya sa nasambitan na seremonya ngani na maipahiling an saiyang pakikidumamay sa pamilya Lunas.
Dugang pa kan opisyal na saro man ini sa mga paagi ngani na mabawasan maski papano an gabat na namamatean ngunyan kan mga binayaan na kapamilya kan marine soldier asin sa pagmumundo kan bilog na Barangay Hindi.
Segun ki Romano, dae ninda malilingawan an ginibong pagbubuwis nin buhay ni Private Lunas ngani sana na maitao an katoninongan na pinagmamawot kan nasyon.
Marurumduman na an nagadan na suldado an pinaka aking nagadan sa nagpapadagos na bakbakan kan tropa kan gobyerno asin kan Maute terror group sa syudad kan Marawi.
