LEGAZPI CITY — Ipigbuyagyag kan principal kan sarong eskwelahan sa ciudad kan Legazpi na warang magigin problema sa isinangat na proponidong ley na kinapapalamananan nin penalidad o multa kan siisay man na dae magtatao nin respeto sa Philippine National Anthem.
Segun ki Danilo Llarena kan Cabangan High School, magabat sa bulsa an multa na P50,000 alagad sa saiyang paghiling, wara man suboot na magigin problema huli ta kabisado na man ini kan mga maestra asin kan mga estudyante.
Dugang pa ni Llarena na gabos na mga eskwelahan an nagkakaigwa nin regular na flag raising ceremony kun saen pigmamandato na mag-atendir an gabos na mga maestra asin estudyante.
Pig-oorgulyo man kaini na base sa saindang obserbasyon, nahihiling niya na disiplinado an mga estudyante sa saiyang napapamayuhan na eskwelahan kun sain aram na kan mga ini an saindang responsibilidad bilang sarong Pilipino oras na madangog an Lupang Hinirang.
Tinawan duon man kaini na importante an papel na pigagampanan kan mga maestra huli ta sinda an nagpapadara sa mga aki kan marhay na gibo asin nagpapahiling nin magayon na halimbawa.
