LEGAZPI CITY – (Update) Nagmumundo ngunyan an bilog na eskwelahan kan Mauraro National High School sa banwaan kan Guinobatan sa Albay sa nangyaring insidente nin paghugot kan saro sa saindang mga estudyante.
Marurumduman na naghugot an 17-anyos na estudyante huli ta nawaran na suboot ining gana na mag-adal.
Alagad sa intrevista kan Bombo Radyo Legazpi ki Evelyn Oyardo, principal kan nasambitan na eskwelahan, dae sinda nagtutubod na habo na kaining magklase huli ta saro ining mahigos na estudyante.
Napag-araman man na honor student ini asin marhay an performance.
Ipigkokonsiderar na ‘ate’ asin katabang ini kan mga maestra sa pagsaway kan saiyang mga kaklase.
Dugang pa ni Oyardo na sarong malambing na aki an biktima asin desidido na makapagtapos maski pa pigsusuportaran kaini an saiyang sadiri sa paagi kan pagsasabay kan pag-aadal asin pagtatrabaho
Napag-araman man na pirming pigdadagitan ini kan ina na pinagtutubudan na nakakapagpa-depress digdi.
Huli sa insidente, nangapudan an nasambitan na principal sa saindang mga estudyante na magrani sa guidance counselor asin sa mga maestra en kaso man na igwang pig-aagihan na problema asin dae pag-isipon na solusyunan an prolema sa paagi kan paghuhugot.
