LEGAZPI CITY – Senegundahan kan Department of Education Bicol an magayon an assessment kan Philippine National Police sa primerong aldaw kan balik eskwela para sa school year 2025-2026.
Segun ki Department of Education Bicol Spokesperson Mayflor Jumamil sa intrevista kan Bombo Radyo Legazpi na generally peaceful man an nagin assessment ninda sa primerong aldaw kan balik-eskwela sa enterong rehiyon mantang wara man sindang naresibing untoward incident o kariribukan na kina-imbweltuhan kan mga estudyante.
Pwedesir pa suboot maghabol an sisay man na mawot magpa-enroll nganing makasabay pa sa primerong semana kan balik eskwela.
Wara man na naireport sa sainda mapadapit sa mga eskwelahan na dae nakapagbukas kan klase kasuhapon huli sa delay o dae pinaglalaoman na insidente sa saindang lugar.
Pigtaram pa kan opisyal na susog man sa saindang updated na datos, nakapagrehistro an saindang departamento nin kabilugang labi 168,000 na nakapag-enroll para sa presenteng school year asin pwedesir madugangan pa huli sa mga late enrollees.
Nagpapadagos man giraray an Brigada eskwela huli ta nanindugan siya na sarong semana antes an pagbubukas kan klase an natatawan ini nin highlight nganing magtarabangan an gabos sa pagbabalik kan kalinigan sa eskwelahan.
Wara man sindang naresibing complaint sa mga paratukdo huli ta nagtutubod siya na napaghandaan man kan mga paratukdo an pagbabalik eskwela kan saindang mga estudyante.
Pagirumdom ni Jumamil sa mga magurang, estudyante asin paratukdo na nagpapadagos an saindang oplan balik eskwela nganing magresibi nin complaint o reklamo mapadapit sa mga enrollment, pagbabalik eskwela, asin sa presenteng school year nganing matawan nin magkakanigong aksyon.
