LEGAZPI CITY — Tinawang-duon ni Senate Committee on Ways and Means chair asin Committee on Health and Demography member Senator Sonny Angara an pagsabay kan check-ups sa paradigm shift kan aspetong pansalud sa Pilipinas.
Segun ki Angara, mas marhay an preventive health care kesa sa curable health care kun saen aminadong kulang pa an esfuersos na ipigpapaotob kan PhilHealth sa ibong kan pag-cover kan check-ups sa indigents asin Overseas Filipino workers (OFW).
Naglalaom si Angara na en kaso maipasar na bilang ganap na ley an ipigbubusol na Universal Health Care bill , 100% nang warang babayadan para sa laboratory tests asin check-up an mga kahimanwa.
Sa presente kaya, nasa P1,000 hasta P2,000 an gastos sa check-up mientras na mataas pa depende kun gurano ka-komprehensibo an isasagibong mga test.
Dugang pa ni Angara na mas madakula man an gastos en kaso magin malala na an helang urog na sa mga pig-iibatarang lifestyle diseases.
