Pig-asigurar ni Presidente Ferdinand “Bongbong” Marcos Jr. na dae na mababa pa an presyo kan paroy hale sa presenteng buying price kan National Food Authority (NFA), sa ibong kan pagbaba ng presyo kan bagas sa merkado huli sa P20 kada kilong rice program kan gobyerno.
Segun saiya, padagos na babakalon kan NFA an dumog na paroy sa kantidad na P18 kada kilo, mantang an marang paroy an nasa pagultangan kan P19 sagkod P23 kada kilo.
Ini an kasunod kan mga report na buminagsak sa P9 sagkod P10 kada kilo an presyo kan dumog na paroy sa pirang lugar arug kan Pangasinan, asin P14 hasta P15 kada kilo man para sa marang paroy na mas hababa kumpara sa presyo kan nakalihis na taon.
Paliwanag kan Presidente, saro sa mga rason kan pagbagsak kan presyo iyo an kawaran nin drying facilities kan mga paraooma kun kaya napipiritan sindang ipabakal tulos an saindang ani sa hababang kantidad.
Huli digdi, nagpoon na an gobierno sa pagbubugtak nin mga rice processing plant asin ginatos na dryer nganing matabangan an mga paraooma na pamarahon an saindang paroy asin makapili nin mas magayon na presyo sa merkado.
Inanunsyar man kan NFA an pagbakal kan 14 truck na gagamiton nganing magbakal nin paroy hale sa mga lugar na hababa an buying price, asin plano kaining bumakal nin 90 truck ngonian na taon asin 600 truck pagsapit kan 2028.
Target man kan ahensiya an pagbakal nin 300,000 metriko tonelada kan bagas ngonian na taon nganing masigurong bastante an buffer stock para sa nacion.
, despite the reduction in the price of rice in the market due to the government's P20 per kilo rice program.){kind=link}