LEGAZPI CITY- Piglinaw kan Department of Agriculture Bicol na dae nakaapektar sa suplay kan mga orig an 5 aktibong kaso kan African Swine Fever o ASF sa rehiyon.
Segun kay Lovella Guarin, an tagapagtaram kan DA Bicol sa intrevista kan Bombo Radyo Legazpi nairehistro an kaso nin ASF sa Buhi Camarines Sur asin apat na banwaan sa Catanduanes iyo an Baras, Bato, San andres asin Virac.
Dae man suboot ini naka apektar sa suplay kan orig alagad mas naglangaw ngunian an presyo kan mga live weight asin karning orig na pigtitinda sa mga merkado.
Nagkakawat sa P210-P220 an presyo kan live weight sa probinsya kan Camarines Sur asin digdi man an igwang pinakamahal na presyo kan karne na nag abot sa P360-P370 pesos an kada kilo.
Mantang sa Albay an igwang P200-P220 an presyo kan live weight asin an karne man an pigpapabakal nin nasa P340- P360 pesos an kada kilo.
Mientrastanto, sa probinsya kan Catanduanes an nag-aabot man sa P170- P180 pesos an presyo kan live weight mantang nasa P260- P280 pesos man an presyo kan kada kilo kan karneng orig.
Sa Camarines Norte an pigpapabakal man an live weight sa kantidad na P200- P210 , sa Masbate an nasa P200-P250 asin sa Sorsogon an nagkakantidad nin nasa P190- P200 pesos.
Segun sa opisyal naglangkaw nin nasa P20- P30 pesos an presyo kan karne huli sa kaso kan nasabing helang.
Dugang kaini, pinagbawalan nguna na magpaluwas nin karneng orig an Catanduanes pasiring sa Albay kun saen an probinsya kan Albay na sana an natatadang nasa pink zone category o warang kaso kan ASF.
