LEGAZPI CITY — Nagbalong magpagadan an sarong preso sa laog mismo kan custodial facilities kan Uson Municipal Police Satation sa probinsya kan Masbate.
Sa nagunong impormasyon kan Bombo Radyo Legazpi, nasambitan na magabat na problema an nakapag-udyok ki Rolando Berdin, 59-anyos na tapuson na an saiyang sadiring buhay sa paagi kan paggilyit sa tuong pulso kaini gamit an sarong matarom na plastik.
Mientrastanto, dae man naipadagos kan nasabing preso an pagpapagadan makalihis na mahiling asin mapugulan ini kan mga kairiba sa laog kan karsel.
Idinalagan man tulos sa ospital si Berdin ngane matawan nin atensyong medikal.
Sa presente, stable na an kamugtakan ni Berdin asin nakaluwas naman sa ospital kun saen ibinalik na ini sa kustodiya kan Uson Municipal Police asin mahigot na binabantayan.
