Idineklarar ni Presidente Ferdinand Marcos Jr. an Oktubre 30 kan kada taon bilang “National Day of Charity”.
Basado sa Proclamation no. 598, nakapalaog sa mandato kan estado sa irarom kan Konstitusyon an pag-asegurar nin patas na social order ngani na masierto an kauswagan asin libertad kan namamanwaan hali sa kapobrehan, sa paagi kan mga polisiyang makrear nin social services, full employment, asin pag-angat sa kalidad kan pamumuhay para sa gabos.
Pinirmahan an nasabing proklamasyon ni Executive Secretary Lucas Bersamin.
Ipigbubusol man sa irarom kan Bagong Pilipinas an transformation sa gabos na sektor asin sa gobierno, kun sain nangingibabaw an pagmakulog asin responsibilidad sa lambang saro.
Sa irarom kan Proclamation No. 598, sinugo an Philippine Charity Sweepstakes Office na pangeotan an pagselebrar kan “National Day of Charity” kakabit kan pag-aram kan mga magkakanigong programa, aktibidad asin proyekto.
Sinugo man an gabos na national government agencies mantang pig-eenganyar an mga lokal na gobierno, non-government organizations, asin pribadong sektor na magpaabot nin magkakanigong suporta sa Philippine Charity Sweepstakes Office asin aktibong makisumaro sa National Day of Charity.
