LEGAZPI CITY-Pormal nang nagdeklara si President Ferdinand R. Marcos Jr. nin state of national energy emergency ngani protehiran an nasyon sa nagdadangadang na epekto kan nagdadakulang tensyon asin iriwal sa Middle East.
Basado sa kabilugan kan Executive Order (E.O.) No. 110 na ipinaluwas kan aldaw nin Martes, Marso 24, 2026, an lakdang na ini may katuyuhan na tulos na masimbagan an huma sa katatagan asin bastanteng suplay nin enerhiya sa nacion makalihis na matukoy kan Department of Energy (DOE) an kritikal na sitwasyon.
Susog sa kasuguan an pagsarado kan Strait of Hormuz siring man an iriwal sa pag-ultanan kan Estados Unidos, Israel, asin Iran an nagigin rason kan pagkadisturbo sa mga kargamento nin langis sa bilog na kinaban.
Aminado an gobyerno na an nasyon lubos na bulnerable sa biglaang paglangkaw kan presyo sa langis asin pagkaantala kan mga supply chains, huli ta an Pilipinas sarong net importer nin mga produktong petrolyo.
Huli digdi, ipigsugo ni President Marcos an mahiwasang pagpapaotob kan Unified Package for Livelihoods, Industry, Food, and Transport o UPLIFT.
Ini an maserbi bilang opisyal na whole-of-government response framework ngani masierto an padagos na dalagan kan negosyo asin paghatod kan mga esensyal na serbisyo, partikularmente na sa mga apektadong mga sektor.
Basado man sa huring pahina kan nasabing kasuguan na pinirmahan ni Acting Executive Secretary Ralph G. Recto, an deklarasyon magigin epektibo sa laog nin sarong taon poon kan ini iluwas, apwera kun bawion o palawigon pa kan ehekutibo.
