LEGAZPI CITY-Inenganyar kan sarong election lawyer si President Ferdinand Marcos Jr. na i-veto an panukalang ley na nagpapaliban sa Barangay asin Sangguniang Kabataan elections (BSKE) na ipapadagos sa December 1 ngunyan na taon.
Pignegaran man ni Atty. Romulo Macalintal na dapat ibitaran kan Presidente na maulit an pagkakasala kung sain idineklarang unconstitutional kan Korte Suprema an Republic Act No. 11935 na suboot ipagpaliban an Barangay asin Sangguniang Kabataan elections (BSKE) kan Disyembre 2022.
Inistilo suboot an reconciled bill bilang ley sa pagtatalaga kan termino kan panunungkulan kan mga opisyal nin barangay alagad malinaw suboot na misleading an panukalang ley na an tunay na epekto, iyo an ipagpaliban an local election sa Disyembre asin ilipat sa enot na Lunes kan Nobyembre sa sunod na taon, na magpapahalawig pa suboot sa panunungkulan kan mga nakatukaw na opisyal na warang public mandate.
Segun pa kay Atty. Macalintal, an reconciled bill kan Senado asin Kamara nagbabayolar sa constitutional rule na dapat sarong subject sana an malinaw na nakalaag sa title kan sarong legislative measure.
Sa reconciled bill, sakop kaini an 3 magkakahiwalay na orolay, enot an pagtatalaga kan bagong termino kan panunungkulan nin Barangay asin Sangguniang Kabataan elections (BSKE) officials hale sa 3 termino na gigibuhon na apat na termino, ikaduwa an pagpapaliban kan eleksyon sa Disyembre 2025 asin ikatulo, an pag-otorisa sa pagpapahalawig pa kan panahon kan pwesto nin mga presenteng barangay asin Sangguniang Kabataan officials.
Magigirumduman na an parehong meeting kan Kongreso kan nakaaging aladaw, an bicameral conference committee report, nagtatalaga sa apat na taong termino hale sa presenteng 3 taon para sa Barangay asin Sangguniang Kabataan elections (BSKE) officials.
Pinagsaro man sa bicam report an Senate Bill No. 2816 asin House Bill No. 11287 na nag-amyenda naman sa Local Government Code of 1991 partikular na kaini an termino asin petsa kan ipapadagos na eleksiyon.
Ipapadara naman ini sa Presidente ngani mapirmahan, enkaso mapirmahan kan executive bilang sarong ley, mauurong an Barangay asin Sangguniang Kabataan elections (BSKE) sa enot na Lunes kan Nobyembre 2026.
