LEGAZPI CITY-Mapadagos an pre-trial conference para sa impeachment case ni Bise Presidente Sara Duterte sa Lunes, Hunyo 22 makalihis na dai makumpleto kan mag-ibong na lado an gabos na ebidensya.
Ini an kinumpirmar ni Atty. Michael Poa, tagapagtaram kan depensa ni VP Sara, makalihis an isinagibong closed-door pre-trial conference.
Segun ki Poa, natapos pa sana sindang magmarka kan mga evidencia para sa sarong article of impeachment asin igwa pang tulo na dapat pag-olayan bago mapuon an paglilitis.
Kabali sa Artikulo III an mga alegasyong bribery, graft and corruption, pagbayolar sa Konstitusyon, asin betrayal of public trust laban sa Bise Presidente.
Dugang pa kaini na naglalaom sindang matapos an bilog na proseso sa Lunes, alagad andam man na magbalik sa Martes kun kinakaipuhan.
Pig-eksplikar man ni Poa na dipisil pa madeterminaran kun nuarin matatapos an pre-trial huli sa kadakol na mga dokumento na kaipuhan na repasuhon asin markahan para sa iba pang artikulo kan impeachment.
Sa ibong kaini, nagtutubod an grupo kan depensa na posible pa man giraray na maabot an target na punan an impeachment trial sa Hulyo 6.
Mientrastanto, nagkaoroyon na suboot an depensa asin prosekusyon sa saindang kanya-kanyang listahan nin testigo.
Pigkakarkulong maabot sa 25 sagkod 30 testigo an ihahampang kan kampo ni Duterte, kabale na an nagkapirang reserbang testigo.
Piglinaw man ni Poa na normal sana an mga argumento asin diskusyon kan depensa asin prosekusyon durante kan pre-trial asin wara man nin personal na iriwal sa pagultanan kan duwang lado.
