LEGAZPI CITY- Nilinaw kan Philippine Ports Authority (PPA) na bako totoo an mga nagluluwas na bareta sa social media sa suboot sarong tug boat haling Indonesia na may lunad na 12 crew na positibo sa Delta variant nin COVID 19 an pasiring sa Legazpi City.
Sa eksklusibong intrevista kan Bombo Radyo Legazpi kay Stephen Agnas, Terminal Supervisor kan PPA, tinawang duon kaini na wara man nin nareresibing abiso o report an ahensya manungod sa mga pigsasabing tug boat na may kumpirmadong kaso nin COVID 19 na nagbabiyahe pa sa dagat.
Segun kay Agnas, tulos man kutang mairereport ini sa saindang opisina na kaso lalo pang pigsasabi sa post sa social media na nagdulag an barko hali sa Butuan City.
Base man sa rekord kan PPA igwa talaga nin tug boat na may pangarang Clyde an hali sa Indonesia alagad bako ini pasiring sa Legazpi kundi sa port sa Barangay Lidong kan Santo Domingo ngani na magdara nin carbon sa sarong cement company.
Katakod kaini dae man giraray pigpapasipara kan ahensya an report kung kaya makikipag-ulay sa Office of Civil Defense Bicol, consignee kan barko asin mismong port operator sa Lunes ngani na diskutiron an nagluluwas na bareta.
Abiso man kan PPA sa publiko na dae basta bastang magtubod sa mga nababasang bareta lalo na kung hali sa social media asin dae na magpalakop pa kaini nganing dae magdara nin pagkahandal sa publiko.
