LEGAZPI CITY— Nagkaigwa nin committee hearing an mga lokal na opisyales kan banwaan kan Polangui kaibanan an mga representante kan poultry farm na ipigrereklamo kan mga residentes huli sa pinaghahalian suboot nin langaw.
Sa intrevista kan Bombo Radyo Legazpi ki Polangui Vice Mayor Herbert Borja, sinabi kaini na nagkaigwa na sinda nin kasunduan ngani na maresolbaran na an problema sa langaw na nakaka-apektar na suboot sa mga residentes kan banwaan.
Segun sa opisyal, nagkaigwa nin suhestyon na dugangan an mga net o screen sa mga entry asin exit points kan nasambitan na poultry farm ngani na maibitaran na makaluwas sa komunidad an mga langaw oras na mag-ugbon an mga ini.
Nagpromesa man suboot an manehamiento kan farm na papakarahayon an saindang sanitation asin aasikasuhon an mga rekisitos sa Department of Environment and Natural Resources (DENR) para sa permit kaini.
Segun ki Borja, pinaglalaoman na sa laog nin 90 aldaw o tulong bulan, makakapagpaluwas nin ordinansa dapit sa sanitation kan mga poultry farm sa Polangui.
