LEGAZPI CITY-Aminado an kalihim kan Department of Justice na si Secretary Jesus Crispin Remulla na nagkaigwa nin komplikasyon mapadapit sa potensyal na ‘whistleblower’ katakod kan isyu sa flood control projects.
Segun sa kalihim na an suboot posibleng tetestigo, an sarong kontratista na kairiba sa mga proyektong imbuelto sa kontrobersiya.
Paliwanag niya na kaya nagkaigwa nin problema huli sa magkakasabay asin manlain-lain na pigsasagibong imbestigasyon kan gobierno sa presente.
Posible man suboot an iba na magbago an saindang isip na magkaigwa nin kusog ki boot na magluwas bilang sarong testigo.
Pighahalat naman suboot an executive order para sa pigbibilog na ‘independent committee’ na mag-iimbestiga asin matutok sa kontrobersyal na ghost flood control projects kan gobierno.
Magigirumduman na dati nang ipigbuyagyag kan kalihim an suboot nakaolat niyang abogado na sarong ‘potential whistleblower’ sa isyu sa flood control projects.
Basado man suboot sa saiyang pakikipagolay, sinabi kan abogado kun pira an porsiyento an nakuwa na pambayad para sa mga kontratista.
Kun sain nasa 20-40% sana an nagaabot sa sainda para sa mga proyektong dapat makatabang sa pagkontrol kan pagbabaha alagad nagigin ‘ghost project’ an mga ini.
