Pighihiling ngunyan an posibilidad na pagsusunad nin kasong pagbayolar sa International Humanitarian Law kontra ki dating Presidente Rodrigo Duterte.
Segun ki Justice Secretary Jesus Crispin Remulla na nakipaghilingan siya sa pamayo kan Department of Justice task force na pigsugo na mag-imbestigar sa war on drugs kan nakalihis na administrasyon.
Binilog an task force ngani na imbestigaran an mga perpetrator kan extra judicial killings sa madugong war on drugs.
Segun pa ki Remulla na pigagamit ninda ngunyan an ley kan International Criminal Court alagad nilinaw na suway an posibleng kaso na isusunad sa korte kan Pilipinas asin dae mago-overlap sa ICC.
Paliwanag kaini na maski bako miyembro kan ICC an Pilipinas, posibleng man liwat an “spirit of complementarity”, na sarong principle kun sain an sarong kaso an dae pig-aakseptar sa ICC kun ini an pig-iimbestigaran na kan sarong estado.
