LEGAZPI CITY- Klinaripikar kan Philippine Institute of Volcanology and Seismology (PHIVOLCS) an ipinahiling kan electronic tilt data kan Mayon volcano na paghubag o inflation na ipigtatakod sa posibilidad kan aseismic magma intrusion hale sa irarom kaini.
Ipig-eksplikar ni PHIVOLCS Director Renato Solidum sa intrevista kan Bombo Radyo Legazpi na an nasabing terminolohiya an nangangahuluhan na pagsakat kan magma na warang masyadong linog na naoobserbaran sa bulkan sa presente.
Segun ki Solidum, daeng malabong mangyari ini sa kamugtakan kan bulkan na mantenidong mainit an vent makalihis an pag-aalburoto puon kaitong Enero 13 ngonian na taon.
Komon na nangyayari an pagsakat kan magma na pigsasabayan nin dakol na pagyugo sa mga bulkan na haloy nang dae nagsasabog kun saen kinakaipuhan munang magkaigwa nin “fracturing” o crack tangarig na makaagi an magma.
Sa ibong na lado, liwat na ipigduon ni Solidum na dae pa pwedeng ibaba an Alert Level 2 status sa bulkan kasunod kan enot nang pahayag na garing naudlot an piglalaoman na dagos-dagos na kutang pagbaba kan mga aktibidad kan Mayon volcano.
