LEGAZPI CITY – Nakahanda na an opisyales kan Barangay Padang, Legazpi City mapadapit sa posibleng huma kan nagpapadagos na pag-alburuto kan Bulkan Mayon asin pag-uuran na dara ni Bagyong Ada.
Segun ki Punong Barangay Harold Bembenuto sa intrevista kan Bombo Radyo Legazpi na naglalaom siya na dae na magkusog an naunambitang raot nin panahon huli ta saro sa saindang pig-aandaman iyo an pagbulos nin mga lahar.
Dae man ninda pighahale an pagsasagibo nin pre-emptive response sa urog na madaling panahon enkaso direktang magtama an bagyo sa ciudad asin sa rehiyon kan Bicol asin magpaluwas nin lahar advisory an Philippine Institute of Volcanology and Seismology.
Madepende man suboot an numero kan piglalaomang i-ebakwar sa magigin kusog kan raot nin panahon antes ini magtama sa kadagaan.
Pigtaram pa kan opisyal na dae dapat pagpabayaan kan gobierno an saindang mga residentes enkaso mag-ebakwar na sinda sa evacuation cites na nakabugtak sa Barangay Homapon kan kaparehong ciudad urog na an supisyenteng supply nin tubig.
Punto niya na huli sa duwang haros magkasabayan na kalamidad, mapipiritan sindang i-ebakwar an saindang mga residenteng naka-istar maski sa 9KM extended danger zone siring man an mga paraooma.
Pagirumdom ni Bembenuto sa saindang mga kahimanwa na magtenir na kalmado mantang nagpasalamat man ini sa mga kapwa niya Punong Barangay sa ciudad na nagpromesa nin kadugangang evacuation site kan saindang Barangay.
