LEGAZPI CITY — Obheto ngunyan kan Commission on Population (POPCOM) Bicol na i-promote an kapakanan kan mga kababaihan sa paagi kan pangapudan na i-lift an “temporary restraining order” (TRO) sa implementasyon kan reproductive health measures, partikularmente na an distribusyon kan mga contraceptives.
Sa ipinaluwas na pahayag kan POPCOM-Bicol, pinangapudan kan komisyon an pag-angat kan TRO sa Implanon and Implanon NXT implants sa paagi kan paghagad nin suporta sa publiko asin pagkondusir nin signature campaign dapit sa isyu.
Nakasurat pa sa statement na nagkokolekta an komisyon nin dae mababa sa sarong milyong pirma ngunyan na bulan ngane na suportaran an saindang petisyon kun saen sa ngunyan, nakapagkolekta na sinda nin 4,564 na pirma sa rehiyon pa sana.
Segun ki POPCOM Executive Director Dr. Juan Antonio Perez, an paparaneng kawaran nin contraceptives, urog na an mga mas barato, an makakaapektar sa maternal mortality sa nasyun.
Oras na mangyari suboot ini, magiging saro ining public health emergency.
Ipigbuyagyag man kan Popcom na labi 13.4 milyong kababaihang Pinay an apektado na kan TRO kasabay na an 6.1 milyong naggagamit nin contraceptives asin 7.3 milyong nangangaipo nin family-planning measures.
