LEGAZPI CITY — Pighahalat pa kan Legazpi City Veterinary Office an pagpirma ni Mayor Noel Rosal sa State of Calamity Declaration sa ciudad tangarig makabakal na kan mga kinakaipuhan na bulong kontra sa canine rabies.
Sa intrevista kan Bombo Radyo Legazpi ki City Veterinarian Dr. Emmanuel Estipona, nasa 14, 500 pang ayam an kinakaipuhan na mabakunahan sa pangandam na urog pang maglakop an problema sa rabies.
Ipig-eksplikar man ni Estipona na bako sana sa ciudad an naglalangkaw na trend kundi sa bilog na Albay.
Nasa P1.5 million an pighahagad na pondo kan oficina na ipigsabay na an alokasyon sa pagconstruir nin dog impound sa sentro kan Legazpi.
Ikinaogma man kan opisyal na dakol na an nagpahayag nin pagsurendir kan mga ayam na dae na kayang atamanon.
Tinawang-duon man kan opisyal na nakatalaang amyendaran an ordinansa dapit sa mga ayam tangarig na mapanimbag an siisay man na iresponsableng dog owners.
