LEGAZPI CITY — Pighahalat pa kan Department of Agriculture-Provincial Agriculture Office an ayudang itatao kan gobierno nacional para sa mga paraomang apektado kan pag-aalburuto kan Bulkang Mayon.
Segun ki Provincial Agriculturist Cherryl Rebeta, dae pa man naitatao sa mga paraoma an P25,000 interest free loan sa irarom kan Survival and Recovery (SURE) Program maging an P50,000 hasta sa P150,000 sa irarom kan Production Loan for Easy Access (PLEA) Plan para sa mga bako apektado kan eruption.
Oras suboot na maibaba na an pondo para digdi, P5,000 muna an itatao sa mga paraoma mantang nasa evacuation centers pa mantang an dugang na P20,000 an kun nakauli na sa harong o bukid an mga paraoma.
Nasa proseso pa kaya suboot ini kun sain kaipuhan nin bangko na makua asin ma-aaply bilang conduit banks.
Dugang pa ni Rebeta, magkakaigwa man muna ki meeting antes na i-release an pondo para sa mga desididong mag-avail kan programa.
Kun babalikan, nagpromesa sinda DA Sec. Manny Piñol asin Pres. Rodrigo Duterte kan pagbisita kaini sa Albay kan Enero 29 nin P100,000 milyon na pondo para sa paraoma kun sain an iba kaini, ibinakal na ki farm input asin an matatada an ipapautang sa mga paraoma.
