LEGAZPI CITY – Aminado an sarong political science professor na dae niya nasabutan an mga nagin punto kan pirang senador asin proseso sa isinagibong botohan mapadapit sa impeachment ni Vice President na nagresulta sa pagka-archived kaini.
Segun ki UST Manila Department of Political Science Paul Francisco sa intrevista kan Bombo Radyo Legazpi na dae niya maaraman kun ngata pa pinag-olayan kun ididismissed an kaso kun naenot nang idineklara na saro ining unconstitutional mantang nagdesisyon sindang i-dismissed an kaso alagad dae man sinda nag convene bilang senate impeachment court.
Pagdoon niya man na nagluluwas na nagigin spokesperson kan anti-impeachment si Senator Rodante Marcoleta alagad dae pa man suboot ini nanunumpa bilang senate impeachment judge.
Palaisipan man saiya kun nyata pinag-olayan pa kan senado an manungod sa impeachment kan Bise Presidente kun enot pa sana an pinili ninda ining i-remand o ibalik sa House of Representatives.
Sinabi pa kan nasambitang professor na an mga senador ngonian an nagbabayolar kan pigtaram ni Senate President Chiz Escudero na dae paggibuhon na playground an Senado.
Nagmistula suboot na kinaon kan Senado an saindang pigparataram sa House of Representatives huli ta maski sinda an minadali man an pag-oolay sa reklamo.
Inomaw niya man si Senator Tito Sotto huli ta tama an ginibo kaining magsunad nin motion to table nganing maghalat asin magtaong dalan sa motion for re-consideration na isinunad kan House of Representatives sa Korte Suprema.
Pigkakatakot niya man na maski buhayon an na-archived na kaso an dae man ini maisasakatupadan huli ta maagi giraray ini sa botohan asin kadaklan sa mga senador ngonian an nagkakampi ki VIce President Sara Duterte na haros makuwa na an mayorya kan senado.
