LEGAZPI CITY- Sinabi kan sarong political analyst na istratehiya ni Vice President Sara Duterte an amay na deklarasyon kan pagdalagan bilang presidente sa 2028 elections.
Segun ki Atty. Michael Henry Yusingco sa intrevista kan Bombo Radyo Legazpi na malinaw na kun siisay an mga personalidad na masuporta sa bise presidente.
Alagad posibleng mawot suboot kaining maaraman kun siisay ba an mga politiko asin grupo na dapat kaining trabahuhon o ligawan ngani na ma-consolidate na an saiyang supporters asin kampanya.
An amay na anunsyo man ni Vice President Sara an posible man suboot na magkaigwa nin negatibong epekto sa kandidatura kaini.
Paliwanag ni Yusingco na mas matatawan nin tsana an mga kalaban kaini sa politika ngani na atakihon siya.
Mientras tanto, sinabi man kan political analyst na magigin dalan man an anunsyo para sa pag-iisip isip kan publiko sa magigin desisyon sa pirilian asin ngani na maghapot an mga ini sa mga magigin polisiya kan joven na Duterte.
Kaibanan digdi an magigin paninindugan kan bise presidente sa isyu sa West Philippine Sea, pagbabalik kan Oplan Tokhang asin iba pang mga polisiya kan saiyang ama na si dating Presidente Rodrigo Duterte.
