LEGAZPI CITY- Tinawan duon kan sarong propesor asin political analyst na kinakaipuhan na magpaluwas nin ebidensya ni Sen. Antonio Trillanes sa saiyang mga alegasyon ki Presidente Rodrigo Duterte urog na sa pahayag kaini dapit sa tagong yaman kan presidente.
Magigirumduman na ipighayag kan senador na igwa nin mga ipigtatago na propriedad asin kwarta na maabot sa P2 billion an presidente kun sain inagyat man ni Duterte an Anti-Money Laundering Council na iluwas an kabilugan kan saiyang kwarta ngani na mawara an pagdududa kan publiko.
Segun ki Prof. Alex de Guzman, makaduda an siring na bagay huli ta kun mapaluwas man an AMLC, bako man siyerto kun totoo ini huli ta kapot na sinda kan presidente asin magin an Bangko Sentral ng Pilipinas.
Dugang pa kaini, dae man talagang masasabi kun sala an timing ni Sen. Trillanes huli ta kalkulado na kaini an pagpapaluwas kan saiyang mga pahayag asin siya na man an bahala na maghampang kan konsikuwensya kan saiyang rebelasyon.
