LEGAZPI CITY – Nagsuspinde nin klase sa gabos na lebel an lokal na gobierno kan Polangui, Albay makalihis an namatiang mag-agang pag-uran.
Segun ki Polangui Municipal Disaster Risk Reduction and Management Council (MDRRMC) head Socorro Sambitan sa ekslusibong intrevista kan Bombo Radyo Legazpi, ipighahadit kan mga lokal na opisyal an pagbaha sa dakol na barangay.
Napag-araman na sa 44 barangay kan banwaan, 29 sa mga ini an flood-prone areas mantang naireport naman an pagrasay nin daga sa nagkapirang lugar.
Susog sa flood advisory hali sa PAGASA weather bureau, pighlalaomang madurar pa hasta alas-7:30 atchan na banggi an pag-uran sa nagkapirang banwaan sa tercer distrito.
Mientras tanto, nagpasiring man ngonian na aldaw an team asin nagkapirang personahes kan Mines and Geosciences Bureau (MGB) sa sinasabing sinkhole sa Pinagdapugan Elementary School.
Nagdakula pa suboot an luho kan nagrasay na daga huli sa halangkaw na soil moisture content sa nagkapirang aldaw nang pag-uran.
Pigbabantayan man an naraot na slope protection project sa Brgy. Sugcad na posibleng magbaba asin makaapektar sa mga residenteng nasa palibot kaini.
Segun ki Sambitan, nagbagsak na ini dawa dae pa pormal na nakukumpleto an patrabaho.
