Nagin matoninong asin ligtas an pagsabat kan bilog na nacion sa taong 2026 makalihis ireport kan Philippine National Police (PNP) na zero casualties asin warang nairehistrong darakulang krimen kan New Year celebration.
Susog sa PNP, puon Disyembre 31, 2025 hanggang Enero 1, 2026 an labi 67,000 pulis asin katabang na pwersa an idineploy sa mga simbahan, kalsada, terminal, tourist spots asin firecracker-free zones nganing siertohon an kaayusan asin kaligtasan kan publiko.
Mantang may nairehistrong insidente katakod kan paputok asin pirang aksidente, warang nagadan asin tulos man na nagresponde an mga otoridad.
Wara man na nairehistrong insidente nin stray bullet asin zero index crimes siring kan murder, robbery asin carnapping.
An mga insidente nin kasulo na natatakod sa pyrotechnics an limitado sa tulong kaso.
Inomaw ni PNP Acting Chief PLTGEN Jose Melencio Nartatez Jr. an pakikisumaro kan namamanwaan asin an maagap na paghahanda kan pulisya.
Segun saiya, patunay ini na sa tamang disiplina asin kooperasyon an pwedesir na magin ligtas an darakulang selebrasyon.
Sienerto kan PNP na mapadagos an mahigot na pagbabantay nganing mamantinir an katoninongan sa kada komunidad bilang parte kan obhetong “Bagong PNP para sa Bagong Pilipinas.”
