Ipigtuga ni Police Brigadier General Arnold Thomas Ibay, regional director kan Police Regional Office Negros Island Region, na wara sindang na-monitor na aumang hiro gikan sa Teves group sa Negros Oriental.
Ginibo kaini an paglilinaw kasunod na man kan pagkakaarestar asin pagdara pabalik sa nacion ni dating Rep. Arnie Teves. Jr. huli sa mga kasong pigkakahampang.
Sinabi ni Ibay na padagos man an saindang monitoring asin dae sila nagko-kumpiyansa.
Enot nang sinabi kan opisyall na wara na sindang private armed groups na nabisto kan nakaaging May 12, 2025 Midterm Elections.
Dugang pa kaini na dae na sinda nagdugang pa nin pulis sa third district kan Negros Oriental huli sa panatag na sitwasyon.
Alagad nagtalaga man liwat sinda nin Quick Reaction Forces (QRF), katuwang an militar sa mga estratehikong lugar nganing tulos na magsimbag sa anumang posibleng isyu sa seguridad.
Sa presente, mantenidong matoninong an probinsya, basado sa pagsubaybay kan lokal na awtoridad sa lugar.
