LEGAZPI CITY- Pigkomemorar kan mga residente asin personahes kan Viga Municipal Police sa Catanduanes an enot na taong anibersaryo kan pagkagadan kan duwang kaibanan makalihis an nangyaring ambush sa national road sa parte kan Brgy. Sagrada.
Agosto 10 kan nakaaging taon kan tambangan an tropa kan mga pigtutubudang miembro kan New People’s Army (NPA) na mahatod kuta kan 10 surrendered drug users (SDUs) sa sarong aktibidad asin nagresulta sa pagkagadan ninda PO2 Eva Torcillino asin PO3 Joseph Tupue mantang tulong iba pa an nairido.
Nag-atang man nin pangadye mantang nagtirik nin kandila asin nagsagibo nin misa sa pinamamayuhang hepatura ni PS/Insp. Dexter Panganiban.
Sa intrevista kan Bombo Radyo Legazpi sa hepe kan Viga PNP, pangapodan pa man hasta sa ngonian an pagbaba kan warrant of arrest sa mga nasukol na responsable sa pangyayari.
Dawa pa kinasuhan na an mga ini kaitong Pebrero 23 ngonian taon, wara pang naibababang resolusyon asin arrest warrant.
Mientras tanto, ipigduon kaini an pagmantenir kan matanos na peace and order situation sa banwaan sa paagi kan pinakusog na information dissemination sa community anti-terrorism asin nagkapira pang proyekto.
