LEGAZPI CITY- Pighahanda na ngunyan kan mga kapulisan an kasong isusunad kontra sa sarong 71-anyos na lola na nagbalo na magpuslit nin iligal na droga palaog sa Legazpi City Jail.
Segun ki Legazpi City Police Station spokesperson Police Executive Master Sergeant Carlos Paña sa intrevista kan Bombo Radyo Legazpi na padagos nindang pig-aaram kun pigagamit sana an nasabing senior citizen sa kalakaran kan iligal na droga o pigigibo ining kabuhayan.
Basado sa impormasyon na nagsaginsagin an nasabing suspek na igwang bibisitahon na person deprived of liberty.
Bilang parte kan proseso, kinapkapan an lola hasta sa madiskubre an pinagtutubudan na shabu sa laog kan bra kaini.
Makalihis na madiskubre kan jail officers an nasabing kontrabando, tulos na nakipag koordinar an mga ini sa kapulisan.
Segun ki Paña na patunay sana an insidente kan mahigot na pagbabantay kan mga otoridad sa laog kan mga kulungan asin nagpapahiling na warang pigpipiling edad o kasarian an iligal na aktibidad.
