Nanindugang nag-agi sa tama asin legal na proseso an mga awtoridad sa pagkumpiskar kan mga luxury cars na presenteng konektado ki dating Ako Bicol Partylist Rep. Zaldy Co.
Segun ki Acting PNP Chief PLtGen. Jose Melencio Nartatez Jr., sinunod kan mga awtoridad an proseso na nakabase sa valid asin presenteng ley ngani na maseguro na an mga operasyon piggigibo nin may transparency, respeto sa due process asin pati na an derechos kan mga imbwelto.
Bilang kasimbagan sa mga pahayag kan legal counsel ni Co, sinabi kan hepe na pinonan an operasyon sa paagi kan orden hale sa mga awtoridad na simpleng sinundan asin nagresponde an mga pulis.
Kabale sa mga nakumpiskar na behikulo kan dating mambabatas iyo an mga high-end models arog kan Rolls-Royce, Toyota Sequoia, Cadillac Escalade asin Lexus.
Mientrastanto, parte man suboot ini kan saindang suporta asin partisipasyon sa inisyatiba kan gobyerno laban sa korapsyon asin sa isyu kan flood control projects.
Pigsierto ni Nartatez na mantenidong aktibo an bilog na pwersa kan National Police ngani na padagos na mabisto asin dagos nang madakop an gabos na personalidad na imbwelto sa anomalous flood control scandal.
