LEGAZPI CITY – Nagsagibo na nin imbestigasyon an mga otoridad mapadapit sa lalaking nakuryente harani sa Legazpi City Public Market.
Segun kay Legazpi City Police Station Public Information Officer Police Executive Master Sergeant Carlos Paña sa intrevista kan Bombo Radyo Legazpi na an biktima an may edad 24 anyos, nagtatrabaho bilang helper sa sarong private store, residente kan Rapu-Rapu, Albay asin paramientras na naka-istar sa Barangay 24-Rizal Street, Legazpi City.
Basado sa saindang inisyal na imbestigasyon an palaog kuta an biktima sa saiyang trabaho harani sa public market asin nagkataon na pigbabaha an saiyang pig-aagihan huli man sa naeksperyensyahang pagbabaha na dara kan raot nin panahon.
Posible suboot nakakapot ini sa poste kan street light na may halangkaw na boltahe kun kaya nakuryente ini na nagin kawsa man kan saiyang pagkagadan.
Pigtaram pa kan opisyal na kan masyerto na wara nang kuryente an nasabing poste an marikas man na na-retrieve an hawak kan biktima asin tulos na dinara sa funeraria nganing halaton an kapamilya kaini.
Susog man sa saindang datus an ini an primerong insidente na may nangyaring pagkagadan sa nasabing lugar huli sa pagkakakuryente sa kasagsagan kan pagbabaha sa ciudad.
Sa presente an pighahalat pa ninda an kapamilya kun mawot pa kan mga ini na isairarom an saindang kamag-anak sa autopsy enkaso igwa ini nin pagdududa sa ikinagadan kan biktima.
Paglilinaw man ni Paña na kun dae na magtugot an pamilya na ipa-autopsy an biktima an nakatalaan man na ideklara ninda bilang case close na an nangyaring insidente.
