LEGAZPI CITY- Naglilibot ngonian an Albay Police Provincial Office sa kada istasyon kan pulisya sa bilog na provincia tangarig na mahiling an sitwasyon kan mga karsel asin an mga preso puon primer hasta segundo distrito mientras na dae pa man nakaabot sa tercer distrito.
Sa intrevista kan Bombo Radyo Legazpi ki PC/Insp. Arthur Gomez, tagapagtaram kan Albay PNP, mismong si Provincial Director PS/Supt. Antonino Cirujales suboot an nagbaba kan direktiba katakod kan kinakahampang na isyu kan PNP sa nadiskubreng ‘secret jail’ sa laog kan Manila District Police Station 1 sa Tondo.
Parte man kan inspeksyon an pag-double check sa mga preso tangarig na makabilog nin rekomendasyon urog na sa mga crowded na karsel mientras na pig-imbitaran man kaini an presnsya kan Commission on Human Rights (CHR) sa pagbisita.
Mientras tanto, kasabay sa mga mayor na pigtutukan kan human rights affairs officer kan PNP an mga comformt room kan mga preso kun saen nanotaran man an nagkapirang problema kan nakalihis na taon.
Ipig-ehemplo pa ni Gomez an nangyari sa Camalig PNP kun saen sa luwas pa nagamit nin banyo an sarong preso kun kaya nakadulag sa bantay na pulis.
