LEGAZPI CITY – (Update) Igwa na suboot na pigsusundang person of interest (POI) an Sto. Domingo Municipal Police dapit sa insidente kam pitong bulan na umboy na narekober harani sa Sto. Domingo port sa Albay.
Antes na ilubong, pinangaranan munang “Maria” kan Municipal Health Unit, an umboy.
Sa intrevista kan Bombo Radyo Legazpi ki PCapt. Genevieve Oserin, hepe kan Sto. Domingo PNP, nakuwaan nin video sa closed circuit television (CCTV) camera an nasabing lalaking may dara kan eco bag kun sain nakuang nakapatos an umboy.
Ipigkaag naman sa social media an nasabing video tangarig na marikas na madakop an posibleng may kagibo kan insidente.
Magin si Mayor Jun Aguas an nagpasugo naman nin lakdang kontra sa nasabing suspek. Nagtutubod pa an hepe na kakapangaki pa sana kan umboy kan darahon sa nasabing pantalan huli ta may mga dugo pa ini.
Naglalaom an mga ini na makukua an personang responsable sa urog na marikas na panahon.
