LEGAZPI CITY – Pig-aagrangay kan mga commuters an labing trapiko tuyong nagkakaigwa nin aksidente sa mga tinampo kun saen pig-aarabot suboot nin pirang oras antes mahali an mga imbweltong lunadan na nakakaulang sa agihan.
Nilinaw man ni PC/Insp. Arthur Gomez, tagapagtaram kan Albay Police Provincial Office, na dae man pigtutuyo kan mga pulis an pagkakaigwa nin labing trapik tuyong may siring na insidente.
Mapasadit o dakulang aksidente, kaipuhan suboot mag-aksyon kan mga pulis kun saen may pigsusunod man sindang proseso kun pano ini rerespondehan.
Kinakaipuhan suboot na magibuhan pa ini nin blotter report kun saen kukuwaon an enterong impormasyon dapit sa insidente.
Kun may mga imbweltong lunadan o biktima, dae man tulos pwedesir na halion an mga ini kun de pa pa napo-proseso.
Kaipuhan kaya suboot na masierto kan mga pulis na may mga dokumento sinda ngane na dae man sinda magkaproblema.
Pwedesir kaya na mahali sa serbisyo an sarong pulis enkasong magkaigwa nin problema.
Apwera pa digdi, nakakapahaloy man suboot an mga onlookers o an nakiki-osyoso sa insidente.
Hagad man ni Gomez na masabutan kan publiko kun medyo ma-oktaba an pagresponde sa mga pigpaabot na report huli ta bako sana saro suboot an pig-aatendiran kan mga pulis.
Piggigibo man suboot kan PNP an gabos na medyos ngane na maparekas an pagtao nin serbisyo sa banwaan.
