LEGAZPI CITY—Ide-deploy na an 95% gikan sa 11,000 na mga personahes kan PNP Bicol sa polling precincts puon ngunyan na aldaw Sabado, Mayo 10, sagkod Mayo 13, nganing masierto an seguridad kan publiko sa napaparaning eleksyon.
Segun ki Police Regional Office 5 Regional Director Police Brigadier General Andre Dizon, sa intrevista kan Bombo Radyo Legazpi, na sa oras kan pirilian haros gabos kan saindang kapulisan an nasa luwas kan opisina asin matatanda sana sa kampo an mga guard duty.
Sinabi man kan opisyal na ipigbabawal an pagdara nin badil huli kan pigpapaotob na COMELEC gun ban, padagos na pag-obserbar nin checkpoints, asin magkakaigwa man nin liquor ban puon sa Domingo, Mayo 11.
Pig-asigurar man ni Dizon na may isinagibong simulation and communication exercises an kapulisan en kaso magkaigwa nin kariribokan sa aldaw kan eleksyon.
Abiso man kaini sa mga kapulisan na dae magbale sa ano man na partisan huli mahigot ining ipinagbabawal kan saindang ahensya.
Pagiromdom man kan opisyal sa publiko na i-report sa sainda an ano man na nagbabalgar sa ley partikular na an may kinaaraman sa eleksyon.
