LEGAZPI CITY — Klinaripikar kan Police Regional Office 5 (PRO5) na provincia kan Camarines Sur an igwang pinakahalangkaw na kaso kan rape sa rehiyong Bicol ngonian na taon susog sa datos kan Crime Statistics Directorate for Investigation and Detective Management, asin bako an provincia kan Albay.
Sa intrevista kan Bombo Radyo Legazpi ki Pol. S/Insp. Ma. Luisa Calubaquib, tagapagtaram kan PNP Bicol, nasa 247 na kaso kan rape an nairehistro sa nasabing provincia puon Enero hasta Nobyembre 30, 2017 mantang nasa ikaduwang pwesto an Albay sa 119 cases.
Magigirumduman na enot nang ipighayag ni Albay Provincial Police spokesperson PC/Insp. Arthur Gomez na halangkaw an numero kan rape cases sa nasasakupang provincia na rason kan pag-apod digdi bilang rape capital of the Philippines puon kan 2015.
Katakod kaini, mahigot man an pag-aksyon kan otoridad sa mga kaso kan rape sa nasabing provincia asin padagos an mga family session campaign sa pakkipagtabangan sa Departmenrt of Social Welfare and Development (DSWD) nganing mabawasan an mga kaso nin panlulugos.
Dugang pa ni Calubaquib na kadaklan sa mga nairehistrong kaso an puon pa kan nakaaging taon asin ngonian sana naireport.
Pag-aasegurar pa kaining nakaantabay an kapulisan asin preparadong magtabang para sa mga kababaihan asin kaakian na nabibiktima nin pang-aabuso.
