LEGAZPI CITY — Naghahanda na an bilog na pwersa kan Bicol Regional Office 5 sa pagbabalik kan PNP sa anti-illegal drug operation kun sain pigkokunsiderar an mga bako magayon na dating akomplishimento kan saindang mga personnel.
Pagbuyagyag ni Pol. S/Insp. Malu Calubaquib na nagbaba na nin guidelines an national headquarters siring kan paglalaag nin body camera asin pagdadara nin kumpletong papeles kada magkakaigwa nin operasyon.
Pigduon man kaini na kinakaipuhan na sunudon an nasambitan na mga kasuguan huli ta kun dae an mga pulis na nagsagibo nin operasyon an posibleng makasuhan.
Piglinaw man kan opisyal na ams nakatutok sinda ngunyan sa rehabilitation aspect kan surrenderees ngani na ma-eliminate sa komunidad an mga drug pushers katakod kan kasuguan ni Presidente Rodrigo Duterte.
Dugang pa kaini na parte kan special law an pagpuho sa problema kan illegal drugs kaya dae pwedesir na halion sa PNP an operasyon alagad an PDEA man giraray an nasa lead role.
Mientrastanto, nagpapadagos man ngunyan an pakikipagkoordinar kan PNP Sorsogon sa Region 8 dapit sa narekober na P125 million kantidad nin cocaine na narekober sa probinsya na pinagtutubudan na hali sa Jin Ming No 16 na narautan sa Northern Samar.
Nakatalaan man suboot na rauton an nasambitan na cocaine alagad pinag-aadalan pa kun sain ini pwedesir na gibuhon alagad posible suboot na sa Camp Crame mangyari an destruction kan nasambitan na illegal drugs.
