LEGAZPI CITY- Ipigtatakod kan hepe kan Legazpi PNP an mga insidente nin hold-up sa syudad sa paramientras na pagpundo kan pulisya sa pagkundusir nin anti-illegal drug operations.
Sa intribista ki PSUPT Nilo Berdin, sinabi kaini na nagbaba an kriminalidad puon kan Oplan Tokhang alagad ngunyan, nangyayari na naman an manlaen-laen na klase nin krimen huli ta liwat na nakakagamit nin iligal na droga an mga durugista.
Base kaya suboot sa mga doktor, talagang nakakaapektar sa isip kan tawo an ipigbabawal na bulong.
Ini man an nahihiling na rason kan hepe kun kaya nagigin madugo kun minsan an operasyon kan PNP kontra sa mga drug pushers asin users kun sain nanlababan an mga ini huli na man ta nasa irarom kan impluwensya kan nakakaraot na droga.
Sa ibong na lado, ipighayag ni Berdin na bako perpekto an PNP arog kan ibang ahensya de gobyerno.
Ini an simbag kan opisyal kan mahapot dapit sa pagkakaigwa nin mga police scalawags.
Sienerto kaini na nagsasagibo na nin lakdang an National Headquarters sa Campo Crame ngani na malinig an lado kan kapulisan.
Laoman man suboot na sa saindang pagbabalik sa kampanya kontra droga, pirmi nindang irerespeto an ley asin an mga karapatang pantawo.
