Preparado na an Philippine National Police (PNP) na magtao nin seguridad sa pinakadakulang prusisyon asin pagtiripon kan mga Katoliko, an Traslacion, sa maabot na Enero 9.
Segun ki Manila Police District spokesperson PMaj. Philip Ines, poco mas o menos 15,000 na kapulisan an ipapakalat sa Traslacion.
Afuera pa ini sa mga personahes kan PNP na ipapadara kan iba pang ahensya kan gobyerno ngani na masierto an seguridad kan publiko asin mamantenir an kaayusan sa tahaw kan piglalaoman na pagdagsa kan dakulang numero nin mga deboto sa kasagsagan kan kafiestahan ni Poong Hesus Nazareno sa Quiapo.
Dugang pa kan MPD official, bubuksan an mga alternatibong ruta huli ta isasara an nagkapirang tinampo nganing matawan nin dalan an mga ruta kan prusisyon.
Sa presente, dae pa nin namonitor na seryosong huma an mga pulis sa pagselebrar kan kapiyestahan.
Liwat na pigduon kan MPD an mga ipinagbabawal na darahon sa prusisyon kabale na an pagdara nin payong, kutsilyo o patarom na bagay, pagdara nin badil, pagpaputok nin firecrackers asin pyrotechnic devices, breakable water containers siring man an pagbabawal sa pagsulot nin hoodie jacket asin sombrero susog sa nag-iiral na ordinansa.
Inaabisuhan man an mga deboto na mapartisipar sa prusisyon na kun dae makakalikay sa pagdara nin bag, dapat transparent ini, bawal man an mga paratinda sa laog kan mga controlled areas, mahigot man na ipinagbabawal an pag-atendir sa aktibidad nin naka-inom nin arak o burat, asin kun pwede, dae magdara nin mga aki o mga may helang.
Sarong no fly zone, drone zone, asin sail zone an iimplementar sa laog kan palibot kan Quirino Grandstand asin simbahan kan Quiapo.
 is ready to provide security for the largest Catholic procession and gathering, the Traslacion, on January 9.){kind=link}