LEGAZPI CITY- Nangapudan an sarong environmental group sa publiko na magin responsable katakod kan dakol na mga basura sa nagkapirang mga binahang lugar.
Segun ki BAN toxics campaigner Thony Dizon sa intrevista kan Bombo Radyo Legazpi na tambak na mga basura an buminulaga makalihis an mga pagbaha na dara kan bagyong Carina.
Aminado an opisyal na matindi man liwat an problema kan nacion sa plastic pollution.
Nagtutubod an grupo na bako sana an flood control projects an dapat na matutukan kundi maging an waste management.
Segun pa ki Dizon na saro sa mga solusyon afuera sa segregation iyo an pagtatao nin awareness sa publiko sa maraot na epekto kan iresponsableng pagtatapok kan basura.
An mga na-eksperyensyahan subtoot na mga pagbaha sa nagkapirang lugar an nagpapahiling sana na dakol pa an kinakaipuhan na gibuhon ngani na mapangatamanan an kapalibutan.
