LEGAZPI CITY- Dae pa nin nareresibeng pormal na komunikasyon an TRODA dapit sa pigsasabing planong pag-phaseout sa mga tricycle sa syudad kan Legazpi ngani na ribayan nin taxicle.
Sigon ki Dante Marigondon, presidente kan TRODA, wara pang nasasabi sainda an Committee on Transportation dapit sa nasambitan na plano.
Alagad sinabi kaini na dipisil pagtubudan an nasambitan na lakdang asin maagi sa halabang proseso.
Hapot kaini ngunyan kun ano an mangyayari sa saindang mga tricycle urog pa na igwa sinda nin mga bagong unit.
Dugang pa ni Marigondon, kaipuhan nin halawig na dayalogo para digdi.
Bako suboot ini simpleng isyu huli ta sa tricycle nakadepende an buhay kan labi sa 2,300 na tricycle drivers sa syudad.
Mientrastanto, sinabi man kan opisyal na nakikisumaro sinda sa sintemyento kan mga jeepney drivers na naglunsar nin nationwide transport strike katakod kan pigpaplantsang pag-phaseout kan gobyerno sa mga unit na labi na sa 15 taon an edad.
